Sikul Kabansaan Kebayau Telipok

Sikul Kabansaan Kebayau Telipok toi ko' ngaran toniba nopo nga' SK Kebayau Telipok, nopo nga iso sikul kabansaan i poinladsong id Kampung Kebayau. Kampung diti nopo nga poinladsong id Nulu Kebayau.

Sikul Kabansaan Kebayau Telipok

Kampung Kebayau nopo nga iso kampung i poinladsong id watas Telipok. Kokompungan di osomok miampai Kampung Kebayau nopo nga Kampung Logkou Baru, Kampung Tamalang om Kampung Tampulan.

SAJARA

Sikul kumoiso di pinoingkakat montok kaapat-apat kampung dii nopo nga winonsoi di toun 1959. Bongunan sikul nopo nga asil goos do tulun kampung i pinuruanan di Gundohing Emat B Balik (Luguan Kampung), Gundohing Sahat B Gital, Gundohing Lunji Sabilan, Gundohing Dulumanan om Gundohing Borit Jinal. Sikul dii nopo nga sukarela songkinoyonon (NVS-Native Voluntary School) om noonuan do ngaran NVS Kebayau Telipok. Bongunan do sikul diti nopo nga winonsoi mantad kayu tobulugu, poring om taap mantad roun rumbio. Pinoingkakat iti miampai minogitaatabang id tana di Gundohing Lunji Sabilan id Kampung Tamalang gama do poinladsong o kampung diti id taatanga mantad kaapat-apat kampung dii. Songulun mongingia', i Gundohing Noruhin b Dulumanan, nopo nga pinoingkakat sabaagi mongingia' mantad do mogigion kampung antakan timpu dii.

Antakan di toun 1960, mogigion kampung, lobi-lobi po diolo i nakatayad id sawat nopo nga minokianu songulun mongingia kitauliah om nogi minokianu montok momonsoi bongunan di lobi tosonong mantad kerajaan. Kalapas noimuayan do pihak di kipionitan, songulun mongingia', i Gundohing Panus B Lokub nopo nga pinaatod do Jabatan Pondidikan Negeri montok mongia' id sikul dii. Pihak di kipionitan nogi nga nokosokodung montok momonsoi bongunan sikul miampai syarat kinoyonon pamansayan sikul dii nopo nga patahakon kumaa pihak kerajaan maya Jabatan Pondidikan Negeri. Au osokodung i Gundohing Lunji Sabilan (sanganu do tana) montok papatahak do tana dii. Goos suai di winonsoi nopo nga minogihum do kinoyonon di kosudong om nakaanu kinoyonon dii id Kampung Tampulan.

Di toun 1962, pinoundaliu o bongunan sikul dii kumaa Kampung Tampulan, Telipok. Gama do osodu o Kampung Kebayau, Kampung Tamalang om Kampung Logkou Baru mantad Kampung Tampulan (kinoyonon bongunan sikul di wagu), miningoos o tongomolohing mantad kotolu-tolu kampung dii, lobi-lobi po Kampung Kebayau montok mokianu sikul id Kampung Kebayau. Iti nopo nga goos di Gundohing Emat B Balik (Luguan Kampung) om Gundohing Sahat B Gital. Gama do goos diolo, pihak karajaan, maya do Jabatan Pondidikan Negeri nopo nga pinapasaga do pokionuon dii. Iso bongunan miampai iso linimput balajalan nopo nga winonsoi di toun 1970 id tana miampai ginayo 2.03 ekar om pinungaranan do SRK Kebayau Telipok. Antakan di 10 Gomot 1970, Gundohing Angkihon Gitut nopo nga kitonggungan montok mongia' id sikul diti miampai tangaanak soginumu 44 tulun. Antakan di 18 Magus 1970, songulun monguunguhup, i Gundohing Awang Besar Salleh, nopo nga pinaatod id sikul diti, pinoposiliu do duo tulun mongingia' id sikul diti. Antakan di 1972, rinuhangan kawagu o bongunan sikul (linimput balajalan) om nogi iso walai mongingia' winonsoi.

Antakan di tun 1984, rinuhangan kawagu duo blok bongunan sikul miampai monikid blok nopo nga haro 3 linimput balajalan, iso linimput mongingia', iso linimput luguan mongingia' om iso walai mongingia'. Ginumu tangaanak antakan dii nopo nga 95 tulun miampai 4 tulun mongingia'.

LUGUAN MONGINGIA

KATAYADAN LUGUAN MONGINGIA' SK. KEBAYAU TELIPOK

BIL	NGARAN LUGUAN MONGINGIA'	NOKOTIMPUUN BORKHIDMAT	GISOM
1	Gundohing Angkihon Bin Gitut
2	Gundohing Hj.Gani Hj.Jaffar
3	Gundohing Angkihon Bin Gitut
4	GundohingHassim Bin Emat
5	Gundohing Mohd Yusri Bin Hj Masri	12 Momuhau 2013	01 Madas 2015
6	Zandi Jumini Hj.Sulaiman	2015	2023
7	Gundohing Mohd. Shafri Bin Salleh@Gzali	2023	baino

Alamat

Sikul Kabansaan Kebayau,

Kaban Suat 43 Telipok,

88450 Kota Kinabalu,

Sabah.

Telefon = +60138108373 (GURU BESAR)

Fax = AISO

Email = XBA4013@moe.edu.my