Istana Ubud

Istana Ubud, rasmi nopo nga Puri Saren Agung, nopo nga iso kompleks bongunan kisajara' id Ubud, Kabupaten Gianyar Bali, Indonesia.

Lambangan do Istana Ubud

Sajara'

Istana dii nopo nga tionon rasmi do paganakan diraja Ubud.

Maamaso pamanahan dau, nokotorimo i Rsi Markandya do wahyu ilahi hinonggo mananom isio do limo gundol di kigatang id lereng nuluhon id Bali, hinonggo poingkakat o kuil tama Besakih dinondo. Miampai sontinimungan tutumanud, kagayat i Rsi Markandya maya magnetik kumaa kinoyonon id gakod do nulu tanga' pulau i popokilap do babang om tenaga. Kinoyonon diti nopo nga Campuhan id Ubud id pogitongkiadan do Bawang Wos om nounsub isio do momonsoi iso kuil hiti miampai ngaran do Pura Gunung Lebah.

Ontok pamanahan dau sumusuhut id posorili do Bali, minomonsoi i Rsi Markandya do piipiro kuil toponsol di suai om minonupu isio do sistom irigison piilangan montok do landskap teres i kakal po gunoon do momumutanom dinondo. Pombontukan banjar nga tua' pomusarahan nogi di Rsi Markandya hinonggo banjar nopo nga majlis kampung di kitonggungan id suang ahal do tulun ginumuan om ugama. Mantad dii, milo boroson do i Rsi Markandya nopo nga kitonggungan kumaa guas Hindu Bali id suang bontuk di bobos ohinomod i roitan sabaagi Ugama Tirtha toi ko' ugama waig obitua.

Mantad nokito ontok abad ko-8, kasasari pantangon miampai akawas o kinoyonon Campuhan sabap no do kuasa rohani dau di agayo. Istilah Ubud nga mantad nogi do istilah ubad i kirati do ubat, sumuku kumaa woyo kolingasan tradisional mogisuusuai susumuni i poinsuni id kinoyonon dii. Kuminakap o sukod susumamba' Hindu id pitongkiadan do Bawang Wos montok sumiliu do popialat, modsu om monimung waig obitua montok upacara kuil om upacara pomolidangan.

Kotolinahasan

Istana, id bontuk seni bina Bali dinondo nopo nga winonsoi ontok pomorintaan Tjokorda Putu Kandel (1800-1823).

Sundung ingkaa, kalapas guminogor pomogunan ontok 1917, naraag o struktur istana nga sabap ii nopo nga tionon do paganakan diraja, oruhai do noinsanangan kawagu pogulu do noukab kumaa tutumombului poinsuusuai ontok toun 1928.

Ogumu watu pinotuan i winonsoi di Gusti Nyoman Lempad (1862?–1978), songulun seniman tempatan di nointutunan. Pavilion toponsol nopo nga kosoruan papaharo do kokitanan sayau ontok timpu totuong. Ponong koibutan nopo nga haro Marajan Agung sandad, kuil peribadi paganakan diraja. Natad id dumbangan do istana nopo nga haro puun nunuk di olumis mantad Bengal om nogi gunoon sabaagi tionon do paganakan diraja.