Aziz Sattar

Datuk Abdul Aziz Sattar (8 Ogos 1925 – 6 Mikat 2014) nopo nga songulun moniiningkono' filem Malaysia id zaman kegemilangan filem Malayu id Singapura. Nokohompit isio id gana do inus sabaagi do moniiningkono, monuunuhu' id filem, monuunumpoirak om nogi monunuat do skrip solinaid doid pakalajaan dau.

Koposion pogulu

Nosusu isio id Pakalongan, Kabupaten Gresik, Jawa Timur Indonesia ontok 8 Magus 1925. Suai ko' ilo' nakaanu nogi yau do pondidikan hilo id Sekolah Melayu Kota Raja, Singapura.

Nokoimpuun o sajara do koposion di Aziz id Tanah Melayu ontok kiumul isio do tolu toun maamaso do tinumanus isio do tapa' dau, Sattar Sawal om tama dau, Satimah Jalal, do minongoi hilo id Singapura ontok di toun 1928. Soira do sinumukod id kampung Pasir Panjang, nokoruba om nakaanu isio do duo tambalut id nombo do nosili nogi yolo diti sabaagi do moniiningkono di nointutunan. Tambalut nopo dau dilo nga i Allahyarham Salleh Kamil om Allahyarham Shariff Dol.

Nakaanu i Aziz do pondidikan id Sekolah Melayu gisom no do daraja' limo. Iri no tu amu isio milo mongoput do ponginabasan dau tu timpu gia do Pongiyanan do Jepun id Tanah Melayu, Borneo Utara om nogi Sarawak id Malaya. Ontok do kiumul isio doid timpu kohopod toun, nokoimpuun yau do pakakalaja sabaagi monuunumpoirak sandad, monondig om manari doid karamayan i pohoroon id kampung dau. Ontok nopo dii doid umul do 20-an, nokosili yau do pakalaja sabaagi do papapanau do luri miampai gaji soginumu' RM150.

Ontok di kiumul yau do 15 toun, nokoumbal i mamai Aziz do soudor Jepun tu natandasan do manakau. Suai ko' ilo', koumbal nogi yau do nokosuang om nokoion id giil solinaid do onom tulan miampai tapa' di Seniwati Roseyatimah, Wak Jasni, tu tinandasan do nokohompit id kes rusuhan Natrah (Bertha Hertogh) id Singapura ontok di toun 1950.