Yukie Chiri
Yukie Chiri (知里 幸恵, Chiri Yukie, 8 Mahas 1903 – 18 Manom 1922) nopo nga Ainu maamamadalin do Yukar (susuyan epik Ainu).
Koposion
simbanaiNosusu i Yukie Chiri id suang paganakan Ainu fidNoboribetsu, Hokkaidō maso era Meiji. Ontok timpu di, minoposikap o porinta mononolod Hokkaido do kopoundolihan Tinaru Jepun kumaa Hokkaidō, miampai minononsog do poundaliu ogumu komuniti Ainu om minagahau karaaralano koposion tradisional diolo. Minopoindalan o porinta Meiji do dasar di alaab montok mongunsub toi ko' manalob amalan koubasanan Ainu miampai mongunsub toi ko' mononsog pintingubasan diolo id suang momogun Jepun. Dumikot do kotimpuunon abad ko-20, piipiro monunuat Ainu minapatayad pomusarahan do pintingubasan no o kaida i milo torimoon montok momogompi koposion komuniti Ainu.[1][2]
Pinaatod i Chiri kumaa id minan dau i Imekanu hilo Chikabumi, id disan do Asahikawa, ontok di onom nogi o toun dau, montok popoinggaan kobolingkaangan kousinan molohing dau. Poingion i Imekanu miampai tama dau i molohing no, Monashinouku, songulun monunusui susuyan Ainu i kikoinganan om au koilo kopio mimboros id suang boros Jipun. Mantad dii, ginumayo i Chiri miampai abaal id koduo-duo boros Jipun om Ainu om abaal doid kesusasteraan lisan Aiunu i ingkuri no orubaan ontok dii. Sundung do umang-umangan id sikul, abantug isido id suang pambalajalan, loolobi id suang inus boros. Mulong do ingkaa, gama prejudis kumaa Ainu, osiriba kotumbayaan tinan dau kokomoi etnik sondii om ingkaa nogi kogumuan generasi sangandad ngaawi disido.[3]
Pomusarahan sondii di Chiri kokomoi pintingubasan koubasanan nopo nga kompleks. Id suang iso mantad suat i sinuat di omulok po isido, minoposuat isido do, "Id suang insan kokirapan mato, natagak no o landskap sandad i haro mantad di laid po; nunu kinaantakan do tulun-tulun ngaawi di pogulu poimpasi miampai otood id tumo om nulu? Yahai ii noolu, okuri no mogiobpinai, kaanu no mintong toomod miampai mato (terbeliak), oimayaan kokito pomogunan i tumilombus mumang buru."[4]
Kalaja
simbanai
Ii nopo kumoinsan nogi di Chiri nokoruba surupu boros Jipun om sarjana boros Ainu, Kyōsuke Kindaichi nga id pintangaan toun sumukod nogi isido ontok do zaman Taishō pogun dii. Mimpanau isido id posorili Hokkaidō montok mogihum poposolimbou sastera lisan Ainu om rinumikot hilo montok rumuba di Imekanu om Monashinouku. Soira nokoruba di Chiri, i poingion po miampai di Imekanu ontok dii, nokopuriman i Kindaichi do potensi disido om mitimbungak miampai dau kokomoi kalaja dau. Soira minopotolinahas i Kindaichi kokomoi woyo di okito dau id suang goos momogompi susuyan momogun om koubasanan Ainu kumaa di Chiri, minaganu isido kootuson do minsingilo, popoopi om papadalin yukar poingompus koposion.[5]
Nokoguli kawagu i Kindaichi hilo Tokyo, nga minapaatod do buuk nuut i aiso suang kumaa di Chiri mooi do kaanu isido poposuat nunu nopo i okito kokomoi koubasanan Ainu om Boros Ainu. Minoporikud i Chiri susuyan-susuyan i tinondig do todu dau, momoguno romaji montok popolombus tuni-tuni id suang boros Ainu om sumusuhut papadalin yukar i noonuan no do transkrip id suang boros Jipun. Nakaanu i Kindaichi monginsasamod disido do mampayat disio id Tokyo montok monguhup id suang goos monimung om papadalin yukar. Sundung do ingkaa, kalapas piipiro tulan nokorikot id Tokyo, om kopihondot totuong id nombo momongo isido antologi yukar koiso, minidu pogun i Chiri gama kegagalan tundu-undu ontok 19 nogi o toun.[3]
Legasi
simbanai
Pinalabus o antologi di Chiri ontok toun sumusuhut miampai uhu Ainu Shinyōshū (Koleksi Epik Ainu kokomoi Dewa-Dewa). Sundung do kitonggungan kanto penaung dau i Kindaichi om editor siri Kunio Yanagita do minapalabus manuskrip di tiagak Chiri, au diolo pinoiliu ngaran diolo id nombo-nombo; boros ponogulu om suang nopo do buuk dii nga sinuat miampai poinggonop di Chiri. Buuk nopo dii nga kiwaa kodolinan id suang boros Jipun, om nunu nopo i bobos kigatang nga teks sandad id suang boros Ainu i minomoguno skrip Roman. Ontok nopo dii, arayou kopio o buuk diti id suang suat bala, popoimbulai kapamantangan kawawagu kumaa koubasanan Ainu id pialatan maamambasa Jipun, om gisom dinondo pointimporon sabaagi toud oponsol montok yukar.
Tadi tomulok kusai di Chiri, i Chiri Mashiho, minopngoput pondidikan miampai tajaan mantad di Kindaichi om nosiliu songulun sarjana i pantangon id suang ponoriukan Ainu. Miampai aiso nokoilo, tinaja i Chiri om tadi disido di Keizo Shibusawa, tumungkus Shibusawa Eiichi, maya kouhupan aiso ngaran.[6] Suai ko ii, minopotilombus i Imekanu goos monuat kawagu om papadalin do yukar.
Sukuon
simbanai- ↑ Sjoberg, Katarine V. (1993). The Return of the Ainu. Amsterdam: Harwood Academic Publishers.
- ↑ Kayano, Shigeru (1989). Our Land was a Forest: An Ainu Memoir. Boulder, Colorado: Westview Press.
- ↑ 3.0 3.1 Fujimoto, Hideo (1991). Gin no shizuku furu furu mawari ni: Chiri Yukie no shōgai. Tokyo: Sōfūkan.
- ↑ Strong, Sarah M. (2011). Ainu Spirits Singing: The Living World of Chiri Yukie's Ainu Shin'yoshu. Honolulu, Hawaii: University of Hawaii Press.
- ↑ Kindaichi, Kyōsuke (1997). Watashi no aruita michi. Tokyo: Nihon Tosho Center.
- ↑ Christy, Alan S. (2012). A Discipline on Foot: Inventing Japanese Native Ethnography, 1910–1945. Rowman & Littlefield. p. 33.