Tobilung
Tobilung nopo nga kawo do Dusun. Tulun Tobilung poingiyon id watas Kota Marudu om id disan ralan Kota Belud gisom id Kudat. Ginumu nopo do monunutur woyoboros Tobulung nga 2,000 tulun ontok di toun 1981.
Orubaan o Dusun Tobilung ponong id Kampung Dudar, Kampung Sarang, Kampung Timbang Manggaris om Kampung Taburon id watas Kota Belud. kokompungan diti osodu mantad doid kakadaian. Daamot dilo, id watas Kuta Morudu nopo nga poingiyon yolo id Kampung Ulu Kukut, Kampung Manggaris Iso gisom Tolu, Kampung Tonsom, Kampung Mangin, Kampung Binatasan om haro nogi id Langkon. Haro nogi tokuri id Tigaman ponong Kudat.
Sundung do baino, kogumuan do sukod wagu nokoundali nodi hilo id suai kinoyonon tu tumoguang do pinsingilaan diolo toi ko pakaraja nga maso po id kampung ot komolohingan diolo.
Pogulu do nokosuang yolo do Kristian om Silam, kotumbayaan nopo diolo nga pagan. Miagal do kotumbayaan do pagan, aiso o tionon do sumamba nga kosoruan do sumamba yolo montok do olingasan do toruol om nogi kosonong-sonongon do momogun.
Ontok tadau koiso, magambawon yolo miampai do momutung do songinan manuk toi wogok tumanud do pokionuon di bobolian. Opongo po do magambawon, mongorunduk toi ko sumambayang yolo do mokianu do koposion tolidas. Gimat toi komburongoh gunoon id sambayang diolo do mongolohou do rusod.