Rinait

Rinait nopo nga iso kawo do samḇayang guugulu. I nopo di pogulu po nga aiso ugama do takiodu Kadazandusun. Kotumḇayaan nopo diolo nga roitan do animisme. Monongkuyaan kasari yolo do Kinorohingan i minamangun nga id ḇontuk do susuyan di tinungkusan diolo. Samḇayang nopo diti nga roitan do rinait.

Kiwaa duo saḇap do nokuro tu momurinait o tinaru Kadazandusun. Koiso nopo nga popoidu nunu nopo i tangaraat. Komoyon nopo tangaraat nga i kobunsakit, korumḇak do tanom-tanom ngawi, kapatai do tayam om nunu nopo i kopogowit do kobolingkaangan do tulun. Koduo, montok mongumolig do tinan id paganakan di momurinait om somḇol ngawi dau, mogumolig do tanom om tayam mooi do au araag.

Soira papaharo yolo do rinait diti mositi do popolubuk do songinan wogok di osuhatanan ginayo. Tayam nopo diti nga owitan id rinait sabaagi ponokolinubuk. Koponongkuyaan nopo do komolohingan guulugu nga i nopo wogok nga tayam di korohian do tinaru mongumolig. Kumoduo nopo nga, iti no tayam di milo diolo posodiaon do osikap om au apagon.

I nopo momurinait nga roitan do bobolian. Soira nopo do momurinait nga momoguno yolo do iso kain tanaru i roitan do sanḏai.

Komburongoh

Supik ku Komburongoh

Komburongoh rinokian

Supik ku pandaian himboh

Burok ku yang halib

Himboh ku tandaruh ngasuk

Supik ku pipompodok

Burok poinsolugok

Poimpompodok di munong

Poinsalugok di dila.