Panahangan Poinlongkod Sikul

Panahangan Poinlongkod Sikul / Pentaksiran Berasaskan Sekolah toi ko PPS / PBS nopo nga iso panahangan di holistik montok manahang aspek kognitif, afektif om psikomotor ii kopitindu do Falsafah Pendidikan Kebangsaan om kurikulum kebangsaan Malaysia. Panahangan diti nopo nga wagu po id pondidikan Malaysia, miagal nogi iri kopoindalanan do Pelan Pembangunan Pedidikan Malaysia (PPPM). Oponsol tomod iti PPS montok papaasil do tangaanak sikul di osulimbang id mogisuusuai aspek.

Komponen Panahangan

Komponen PBS haro duo kategori, akademik om okon akademik. Kategori akademik nopo nga Panahangan Sikul (PS) om Panahangan Pusat (PP), kategori okon akademik nopo nga Panahangan Psikometrik (PPsi) om Panahangan Aktiviti Jasmani, Sipoot om Kokurikulum (PAJSK). Goduduo kategori diti manahak pongiktirafan om autonomi kumaa mongingia' montok popoindalan panahangan formatif om sumatif i poinlongkod sikul.

Panahangan Sikul

Panahangan i napalan, nowonsoi, noulud, nointangan, norikud, om noruput do mongingia' sikul di kohompit.

1. Poindalanon o panahangan formatif miampai miampot do proses pongiaan om pambalajaran (P&P). Poomitanan instrumen di milo gunoon nopo nga lambaran karaja', pongintangan, kuiz, sanarai simak, ruputan timbaba'on, timbaba'on id walai om poniisan.
2. Poindalanon o panahangan sumatif id kolimpupuson do tikid unit pambalajaran, panggal, wulan om toun.

PS kiguno sabaagi panahangan montok pambalajaran om panahangan kokomoi pambalajaran.

Panahangan Pusat

Panahangan i noulud, nointangan, norikud do mongingia' id taang do sikul tumanud do kooturan panahangan, instrumen panahangan, timbaba'on, garis tonudon, kooturan penskoran om ponggredan i pinalabus do LP id suang timpu di pinatatap tumanud do mato balajaran. Ruputan pinalabus do LP.

Panahangan Aktiviti Jasmani, Sipoot om Kokurikulum

Panahangan i uludon, rikudon, om poruputon do mongingia' id taang sikul tumanud do kaampayatan, kaampayan om kinogompoton do tangaanak id suang aktiviti sipoot, kokurikulum om ekstrakurikulum. Poindalanon o Standard Kalangkasan Fizikal Kabansaan (SEGAK) om Body Mass Index (BMI) montok manahang om poporuput aktiviti fizikal tangaanak sikul.

Panahangan Psikometrik

Panahangan i poindalanon id taang sikul om/toi ko' longkod montok monuku do komilaan (innate ability and acquired ability), kabaalan momusorou, kabaalan manalasai kobolingkaangan, rahi, kecenderungan, kowoowoyoon om personaliti tangaanak sikul. Panahangan diti amu poinlongkod do kurikulum om proses pongiaan om pambalajaran.