Kumokodong

Kumokodong nopo nga sumuku iso kawo rogon mantad tinimungan rogon gayo i piaraon do sosongulun. Koubasanan nopo momiara kumokodong nga tondu i kitudu montok manamong do dapu om momoligogon tulun di karaatan. Pomiaraan rogon diti ointutunan sabaagi do solusuk. Tombiruo kumokodong monongkuyaan do onuan di momiara do raha mantad tondu di mogontian toi dankosusuan montok takanon.

Tombiruo kumokodong nopo nga popomilo di momiara do sumiliu sabaagi iso kawo tombiruo di kitulu miampai tinai' i kibinabang om tumulud mogihum do takanon. Tumulud i kumokodong di id walai di noilaan do kiwaa tondu di dankapaganakan om mogihum kosiwatan do monguo om monosop do raha di tondu soira au pointorodok.

Noboros do laang monolibamban kakasahan kumokodong nopo nga miampai popoiliu roun kirugi miagal ko' roun mongkuang id siriba walai tondu di dankapaganakan. Ingkaa iti boros tu orosian o tombiruo kumokodong minsomok do walai di kirugi tu orosian do kasawit o tinai id rugi di.

Tulun di momiara kumokodong kaanu mongodong do tulu miampai tinai' diolo om tumulud mogihum do tondu di mogkosusu montok manganu takanon kumaa di kumokodong. Alapas do kaakan, potobungon om pologoson di kumokodong o tinai' id bagaton i kisuang do souka montok popoingkodo tian pogulu sumuang koimbagu id suang do tinan mantad.

Iso nopo laang di kibagas montok mongintutun do sanganu kumokodong nga miampai popoturug do tinan di aiso tulu i niduanan maamaso sumoliwan iyolo mogihum do takanon. Ingkaa iti tu soira koguli iyolo, kopioput o tulu di id tinan miampai pogolikud. Tulu nopo nga poingontong id dohuri tinan.