Jennifer Saul

Jennifer Mather Saul (nosusu ontok 19 Mansak 1968) nopo nga songulun surupu falsafah di poingkaraja' id suang falsafah boros om falsafah feminism. Saul nopo nga songulun professor do falsafah id University of Sheffield om id University of Waterloo.

Biografi

Saul nopo nga kiharo ijazah sarjana muda mantad Universiti Rochester om ijazah sarjana om nogi PhD mantad Universiti Princeton, hinonggo miningsingilo isido id siriba do Scott Soames.

Minonuat i Saul iso ruputan montok do Koisaan Falsafah British om Koisaan Tondu id suang Falsafah UK miampai di Helen Beebee i kiuhu do "Tondu id suang Falsafah id UK: Iso Ruputan". Asaru i Saul monuat komi kokomoi tondu id suang falsafah, id suang mogisuusuai kosoliwanon okon ko' akademik.

Saul nopo nga mononuridong om monunuat blog montok do Feminists Philosophers, iso forum di manahak fokus kokomoi jantina awagat sampaping. Forum Kempen Panangbarasan Jantina nopo nga popokito do kokurian kaampayatan om koobian do surupu falsafah tondu id ababayan sompomogunan.

Gana ponoriukan

Ponoriukan apangkal di Saul nopo nga id suang falsafah analitik boros om falsafah feminis. Id suang buuk 2012 dau mantad Oxford University Press, Lying, Misleading and What is Said: An Exploration in Philosophy of Language and in Ethics, minomboros isido do pisuayan tudut om koborulangan nopo nga signifikan maya teori om popointalang do mogisuusuai ahal id suang falsafah boros i mionit do suang semantik, implikatur, om panatalan. Suai ko' ii, popokito nogi ii piipiro ralan komunikasi om pibarasan i kosudong montok analisis etika tu ii nopo nga pisuayan di kirati mantad aspek etika. Minimboros i Saul do au aantakan maya umum o tudut maya etika lobi araat mantad ko' koborulangan. Minimboros i Luvell Anderson id suang kotolinahasan dau montok buuk dii do "Buuk dau nopo nga koruhangan di osonong kopio kumaa kosusastaraan di mumang buru kokomoi do nunu i barasan do falsafah boros di noguno".