Gamḇal

Gamḇal (Inggilis : image, picture) nopo nga tinimungan do titik, garis, bidang, om wotik do momonsoi tiso-iso kokitanan. Koubasanan do okito maya do duo pongotulan, miagal do linukisan, ginambar, om okito id tolu pongotulan, miagal do bukakak.

Susuyan Kodori

Tumanud do susuyan, ginuno do tulun ot gamḇal montok do poposunud kopoposion monikid tadau diolo. Koubasanan do lukison diolo nopo nga iri tongoburu-buru. Otumbayaan yolo do nung lukison diolo gamḇal diri, kapangagamit yolo do lobi ginumu buru-buru. Linukisan diolo diti ogumu okito id tolig do kuang watu it monoroinsan noh do opintoliban do tulun suai.

Gamḇal di kumoiso do linukis nopo nga ontok 35,000 toun pogulu. Mantad dilo, noktimpuun tongotulun do momolukis tumanud do longon diolo. Mononoriuk susuyan minongolohou timpu dilo do timpu kopolobusan pomusarahan. Linukisan id kuang nokito di Maria, songulun tanak hahangai di mononoriuk susuyan pinungaranan do Marsilino Di Sautuola (Marcelino De Sautuola) ontok toun 1879, kirupa do sontinimungan Auroch (sapi bolih (Inggilis: Ox) it alaid no do nopupus) id kuang Altamira, Spanyol boogian koibutan. Sumusuhut dilo, nokito gamḇal di nokodori om nokotonuh id kuang Lasauk (Lascaux), Paransis ontok toun 1940. Nopunsuan do gamḇal mammoth, bison, tambang kutub om kuda id tolig do kuang nokomoi. Haro nogi linukisan iy nokito ontok toun 1969 id gua sosomok do Twyfelfontein, Namibia, kiumur solinaid 30,000 toun. Linukisan id gua Chauvet, Paransis boogian barat daya, nokito ontok toun 1994 om kiumur solinaid do 31,000 toun. Linukisan dilo winonsoi momoguno do tohun, kapur, arang batu, om susuai poh. Iso karalano di noubasanan do tulun gulu-gulu do momonsoi gamḇal nopo nga popotokop do longon diolo id tolig do kuang om tiasan do tongoroun di napapa diolo toi watu do kiwotik. Wotik di asaru do gunoon nopo nga aragang, obuhou, osilou om oitom it milo do wonsoion mantad nunu nopo miagal do raha pigoulon do lunok.