Bosou

Bosou, iso taakanon di ointutunan id piolitan tinaru Kadazan-Dusun om Murut id Sabah. Ointutunan nogi sabaagi iso taakanon koubasanan mantad pogun Sabah. Bosou nopo diti nga' kaagal-agal do perkasam toi ko' jeruk. Koubasan, bosou diti nopo nga' sabaagi do pongukab louson. Taakanon diti milo nogi posodia'on momoguno do tonsi (paus, bakas (non-halal)), sada' (turongou, rokot, saraii', lumpis) om haro nogi momoguno kinotuon (pohuo', tuhau, layo, nangko, sangop, langgayung, hobung/soko).

Kiwaa mogikaakawo ngaran do taakanon diti id mogisuusuai kinoyonon miagal do nonsom, sambaat, kinaraatan, gagau, om tinamba (id Ranau).

Laang Do Momonsoi (montok 1 kaakanan).

Kakamot mogonsok:

• Sada' (turongou) - 4 (Tumanud do kosionuan di momomonsoi)
• Pangi - 3 (kakamot di tapangkal montok poposodia Bosou om mooi do mongilag nansakan mantad rumaag)
• Takano
• Tusi
• Kinotuan (soko, tuhau)

Id siriba nopo nga' ralan poingkuro do momonsoi bosou diti;

1. Giuhon sada' miampai takano om tusi.
2. Lapakon o pangi momoguno do pais montok mongongoi tonsi do pangi.
3. Poroloton o pangi id giniu sada om takano.
4. Poroloton o kinotuon di pinili tumanud korohian sondii miagal do nangko, paranggi tomulok om tuhau montok manamba roso. (milo nogi momoguno do tiwak togutui.

Pilangatan diti nopo nga' poopion id paayanan (koubasan nopo nga' kakanan tokoro) om somponon miampai oogot solinaid sominggu toi ko' gisom do oonsok kopio, pogulu do akanon. Sokiro takano di gunoon nopo nga' kino'onsoko, nuru do andadon gisom kosogit. Koubasan nopo, poopion o bosou diti id pinayanan di opitat kopio sompom om amu osuag do tongus. Milo poopion o bosou solinaid 6 tulan gisom sontoun sokiro olumis o poopian. Soira oonsok o Bosou, milo nogi akanon nopo toi ko' onsokon kaagu pogulu do akanon miampai takano.

Tua' pangi nopo nga' roromu momosou di apangkal montok mongilak do ounos om koutong, onuon o tonsi miampai monumbuk do isirong tua' gisom oukab.

Poopian om kopotoundaan

Koubasan nopo, poopion o bosou id paayanan di amu osuang do tongus tu' osingud kopio ta'au, om iti nogi nga' montok mongilag do langau om kulat do monosomu bosou diti. Bosou diti nopo nga' insaru poopion id tawadak di sinimpon do sopilut. Poopian koubasanan suai miagal do kakanan, nga' dondo nosimbanan no kumaa lalapatan polositik om butul kaca. Koubasan poopion o bosou diti solinaid do limo gisom turu tadau pogulu milo do akanon.

Milo akanon tomod toi ko' onsokon o bosou pogulu do akanon. Koubasan nopo, onsokon o bosou montok managak do ta'au om montok momoruhang do roso. Bawang, lado om roromu suai milo poruhangon montok momoruhang do roso pogulu do akanon miampai takano om kinootuan, miagal nogi do budu om tempoyak.

Noputan soliwan

• My Homemade Bosou. Archived 2009-02-18 at the Wayback Machine
• Let’s make bosou.